Памерла праўнучка Францішка Багушэвіча

Крыстына Шманьда, праўнучка клясыка беларускай літаратуры Францішка Багушэвіча.Пра гэта паведаміў у сваім Фэйсбуку журналіст Віктар Шукеловіч, паведамляе «Радыё Свабода».Шманьда нарадзілася ў 1932 годзе пад Смаргонямі. Тады гэта быў Ашмянскі павет Віленскага ваяводзтва ў складзе Польшчы.

Яе маці Станіслава Тамашэўская была сярэдняй дачкой Тамаша Багушэвіча, сына паэта Францішка Багушэвіча.«Калі Крыстыне было 7 гадоў, яе разам з маці і братам бальшавікі выслалі ў Сібір. Большасьць яе ўспамінаў з тых часоў была пра ежу: пра дзікую моркву на лузе, кіслую капусту, сланечнікавыя жамерыны з фабрыкі алею, ляндрынку ад суседа, якая тады здалася ёй найвялікшым смакоцьцем у сьвеце...», — піша Шукеловіч.З высылкі сям’я Тамашэўскіх здолела выбрацца ў 1942 годзе, калі ў СССР падчас Другой сусьветнай вайны фармавалася польская Армія Андэрса.

Спачатку Тамашэўскія перабраліся ў Пэрсію, а пасьля ў Індыю.Толькі ў 1947 годзе Станіслава Тамашэўская зь дзецьмі змаглі пакінуць Індыю ды выехаць у Польшчу, дзе ўзьяднаньня зь сям’ёй чакаў муж і бацька Юзаф Тамашэўскі. Падчас вайны ён змагаўся ў Арміі Краёвай на Ашмяншчыне, а пасьля заканчэньня баявых дзеяньняў здолеў выехаць у Польшчу на землі, атрыманыя ад Нямеччыны.Сямʼя Тамашэўскіх жыла ў горадзе Гіжыцку на Мазурах.

Крыстына ж пасьля заканчэньня хімічнага факультэту ў Познані пераехала разам з мужам, хімікам і музыкам, у Варшаву. Тут яна працавала настаўніцай хіміі ў школе.Ніхто з прамых нашчадкаў Францішка Багушэвіча цяпер не жыве ў Беларусі: некаторыя зь іх жывуць у Польшчы, а некаторыя — у ЗША.